Nagriku Saribu Sungai

Duduk di ujung lanting manjanaki banyu baarus sindum
Mendam marasaakan banua bangaran saribu sungai
Kaya apa batawas juakah lagi kenanya
Rumah lanting nang maulah asa banua sorang pina si’im

Dahulu nyaman banar handak batutukar apa nang diperluakan
Wayahini ngalih malihat jukungjukung lalu mambawa dagangan
Banyak sungainya ditajaki rumah sampai basampuk burit
Mun sudah kabanjiran anyar pina tumbur

Manjanaki kasubarang tajanaki bangunan nang batingkattingkat
Asa himung jua pang banua batambah maju
Tapi mun dipikirakan kalimpatan pulang
Harus jua tapikirakan kawakah tanahnya manahan
Banyak gedong pina méréngan

Banyak urang datang matan subarang batakun tanah Banjarkah ini
Urang mambayangakan nang ngaran tanah Banjar itu mukaranah béngkéng
Banyak rumah bubungan tinggi rumah gajah baliku rumah palimasan rumah palimbangan
Mun kaya ini ngalihai bapendér
Kaya apa banyak rumah manuruti model rumah urang kepér

Sapatutnyalah urang banua jangan sampai kahilangan jiwa kabanuaannya
Siapa lagi nang mamalihara tanah banyu ini mun kada kita sorang
Apalagi mun handak maju kaya urang
Jangan jua katuju barungkis papadaan

Duduk di ujung lanting ada jualah tataduh hati
Malihat ilung bakambang di tangah batang banyu
Biar sahebar ilung tapi tatap manunjukakan rasa kabanuaannya
Malihat jukungjukung marénda riwayat nagri nang bauntungbatuah

Bbaru,2009-10-22

Indonesianya : (more…)